ملخص رواية ماذا لو للكاتبة ساندرا سراج

 (فيلم الجزيرة ) ..فيلم مش من عالمنا 

كتب : عبدالرحمن هشام 

السينما مليانة بأفلام كتير منهم الأكشن والرومانسي وأحياناً هتلاقي الرعب والفانتازيا وأفلام الخيال العلمي ، لكن كل ده كوم و الفيلم اللي مفيش اختلاف عليه واللي محتواه كله على بعضه عظمة ومينفعش يمر علينا مرور الكرام وهو فيلم ( الجزيرة ) ، فيلم الجزيرة واحد من أجمل الأفلام المصرية والعربية في فترة الألفية الثالثة وكل اللي مثلوا في الفيلم بالجزئين كانوا هما نجوم جيلهم في الوقت ده ، الفيلم ده تقدر تتفرج عليه مرة واتنين وتلاتة و عشرة و أكتر ومتزهقش منه لأن قصة الفيلم بالشخصيات اللي فيه بكل حاجة وخصوصاً ريأكشنات الممثلين اللي بتساعد المشاهد إنه يتفاعل مع الفيلم وحاسس إنه واقع ومش خيال وكل حدث بيجر معاه حدث تاني والأحداث تتوالى يا عزيزي ومع كل مشهد بتتأكد إنك على موعد مع مفاجأة كبيرة مجهزها لك مخرج الفيلم

شريف عرفة اللي بيبدع دايماً في كل أفلامه ، لازم تركز في أدق التفاصيل في الفيلم علشان تفهم الأحداث ماشية إزاي ولما تركز هتلاقي نفسك متفاعل أكتر و مستني تعرف ( ها إيه اللي جاي ؟ ) 

خلينا نتكلم شوية عن فكرة الفيلم اللي بتوحي من البداية عن تاجر سلاح ومخدرات والبوليس بيطارده وخلاص ، خليني أقولك لأ الفيلم فكرته أعمق من كده وبيدي قيم ومبادئ رغم إن ( منصور الحفني ) مجرم ولكن أهم شئ بيعلمك الأمانة وإنك لازم متخونش يعني متكونش زي ( حسن ) عم منصور لما حاول يقتل منصور ، بتتعلم إنك تاخد النصيحة من الكبير زي منصور لما قعد مع أبوه ( علي الحفني ) علشان ينصحه و يقوله إنه خلاص هيقابل رب كريم ، بتتعلم كمان إن مش لازم تاخد حقك في ساعتها لكن ممكن حبة عقل و تفكير هي كفاية أوي زي منصور لما رجع الفلوس والبضاعة ، كمان الفيلم مش مجرد مشاهد ضرب وبس لكن كمان مشاعر زي حب الأب اللي ظهر في مشاهد بين أحمد السقا ومحمود ياسين ، الحب اللي ظهر بين منصور وكريمة واللي بسببها منصور كان هيضحي بنفسه كذا مرة ، كمان مشهد من مشاهد الخوف لما كريمة اتضربت بالنار كان ساعتها منصور خايف لتموت و تروح منه ، نروح للظابط رشدي وهدان واللي جسد دوره خالد الصاوي بشكل أكتر من ممتاز كان له مشاهد كتير ومهمة و له جملة بترن ( أنا اللي عملت منصور الحفني وأنا برضه اللي هنهيه ) ، أما الظابط طارق اللي كان نفسه يطبق القانون في الصعيد عموماً وفي أرض الجزيرة و الصراحة إن  محمود عبدالمغني مقصرش في الدور وقام بيه على أكمل وجه و لما واجه الظابط رشدي بحقيقة إنه متفق مع منصور مكنش خايف كان من أقوى المشاهد واللي شهد كمان تهديد رشدي للظابط طارق و إنه مش لازم يتكلم لأنه مش من مصلحة حد وكمان مشهد الظابط طارق مع منصور لما منصور قاله إحنا معندناش اختيار أنا طلعت كده علشان أبويا كان كده وأنت طلعت كده علشان أبوك كان كده فقاله الظابط طارق إنه ربنا عطانا الإختيار علشان يبقى فيه حساب فمنصور رد عليه وقاله : سيبني أنا يا باشا حسابي يكون في الآخرة وانساني ، باسم سمرة ( حسن الحفني ) برغم إن دوره كان صغير في الجزء الأول إلا إنه أثر بشكل كبير في الفيلم من أول ما كان دراع منصور اليمين وبينفذ وصية أخوه بإنه يكون عينه اللي بيشوف بيها لحد ما راح للظابط رشدي وسمع التسجيل اللي كان بيتفق فيه منصور مع توفيق على إنه يديله نص أرضهم مقابل إنه يتجوز كريمة ، مكنش ( حسن الحفني ) مصدق إن ابن أخوه يعمل كده لحد ما واجهه و سأله إزاي يعمل كده علشان واحدة .

وقال جملة مهمة يمكن أهم من جملة ( I don't know even who are you ) اللي بقت تريند ، حسن قال : (أنا آسف يا ابن خوي بس لازم حد يضحي علشان الباقي يعيش ) و ضربه بالرصاص ، يعني هنا هو حط إن التضحية لازمة أو نتيجة للي جاي طب اشمعنى هيضحي بمنصور يمكن لأنه مثلاً هيكون السبب في إبادة عشيرة كاملة بسبب حبه لكريمة ، الفيلم جميل جداً و كل دي أجزاء قليلة جداً منه بس أنت حرفياً لازم تتفرج عليه و تتابع الجزئين ، وفي النهاية أحب أختم بجملة من منصور قالها : ( الدنيا رخيصة على الغالي ، وغالية على الرخيص ) .