ما نشعر به و يغنيه أمير عيد

 

كتب: حسن الشحات 

أنت كشاب في مقتبل حياتك طبيعي هتواجهك عدة مراحل زي إنك هتفرح هتزعل هتحب و مش هتعرف تعبر أو إنك هتحب و تترفض أو إنك هتحب و تتحب و تعيش قصة حب ، ووارد إن حبك ينتهي بالفشل أو يكمل و بعيد عن العلاقات ممكن تكون نفسك ناجح و مش عارف تاخد الخطوة بس تكون خايف ممكن تاخد الخطوة تنجح أو تفشل. 

كل ده و كل المراحل دي اتكلم عنها أمير عيد في أغانيه بالإضافة إنه كان ليه آراء سياسية و نقد للإعلام المصري و نقد للمجتمع المصري و للمجتمع بأكمله و نبدأ نتكلم عن الأغاني اللي بتعبر عن حال كل واحد فينا. 

- نبدأ بإنك فرحان و متفائل ف أمير عيد عنده أغاني كتير تدعو للتفاؤل زي:(صباح الخير - عندي فكرة متأجلة لبكره) ، و اللي بيعبر عن تفاؤله ببداية يوم جديد في الأولى و التانية إن عنده فكرة تقدر تغير حاجات كتير. 

- أما عن الزعل و الحزن فخلينا نتكلم عن واحدة من آخر ألبوم أُصدر من باند كايروكي غناء أمير عيد و اللي هي " بسرح و أتوه " اللي قدرت توضح في إن أنت كشاب في مرحلة الشباب اللي كلها نجاح و حياة و تفاؤل و الفرح في حياتهم بيكون عبارة عن ذكرى مجرد ذكرى و إن أنت كشاب لن تستطيع مواكبة الأحداث و دماغك كلها بقت في الماضي و أحداثه اللي فات عليها كتير و أنت مش قادر تتخطاها. 

- أما لو أنت حبيت و معرفتش تعبر عن اللي جواك ف أمير عيد أصدر أغنية بعنوان " حكمة الأيام " من مسلسل ريفو و اللي كفيلة إنها ترجعك لنقطة الصفر ، قصتي مع الأغنية دي كنت بقول لواحد أنا كان عندي كلام كتير محتاج أوقوله و ساعتها بيقول ( في كلام جوايا متشرحش كان نفسي أقوله بس الوقت مسمحش)، و اللي لحظة الموقف بحسبه بيقول هو زي تريقة على كلامي طلعت دي أغنية و أغنية قالت اللي مكنتش عارف أقوله و تكملتها: كان نفسي أكون معاكي و أدلك على الطريق في ضهرك أفضل واقف و أكون ليكي الصديق و دي حكمة الأيام أكون في حياتك... بس مليش مكان). 

- هتحب و تتحب و ده بيبان من امير عيد في أغنية من أنجح و أشهر أغانيه " ليلى " و اللي بيحكي فيها إزاي كان بيحب ليلى اللي هي مراته دلوقتي من و هما صغيرين لحد ما بيتجوزوا و بتكون نجحت علاقة الحب بينهم من صغرهم لحد ما كبروا. 

- حتى لو حبك فشل ف أمير عيد ميرضاش يسيبك كدا بائس زي ما شوفنا كلنا في أحد أغاني مسلسل ريفو و اللي اسمها على باب السيما و اللي بيحكي إنه حاسس بوجع أي اتنين كانوا في قصة حب و مكملوش علشان هو مجرب كل ده. 

- لو نفسك تنجح و مش عارف تعمل إيه و متلغبط عندك تردد في كل حاجة من جواك، أمير عيد أصدر مؤخرا أغنية بعنوان" متكتف " و اللي كانت بتبدأ متكتف مهموم موجوع و ضعيف و شجاع و اللي بتوصف حالة كتير منا أما يحس إنه متكتف و عليه قيود كتير تمنعه يحقق حاجات بيتمناها و مهموم حزين و حاسس إنه موجوع و ضعيف و كأنه مكنش و شجاع رغم كل ده و هنا أمير بيبين كمية التناقض الكبير اللي جوانا كشباب. 

كمان ل باند كايروكي مواقف سياسية كتير زي إنهم نزلوا ميدان التحرير أيام اعتصام المواطنين فيه و غنوا الأغنية الشهيرة " يالميدان "، زي ما أنا و أنت مش عاجبنا حال الإعلام المصري كمان أمير عيد مكنش عاجبه ده لما قال:(بقلب في القنوات علشان أقتل الوقت و الملل نفس النفاق نفس الفساد نفس الغباء و الهُبل على قفانا بياكلوا عيش و اللي يطبل يعيش و الأقرع)، و اللي فيها انتقاد صريح وواضح لوسائل الإعلام و لو كملنا باقي الكوبليه هنعرف إن أمير انتقد و وصف بعض الإعلاميين بإنهم منافقين و كلهم بيقولوا نفس كلام بعض الأصلع و أبو شعر كلهم نفس النفاق و بيجيبوا مشاكلهم و مشاكل البلد في الشعب.