اسطوره النداهة

 ( النداهة ) .. أسطورة الطرق الزراعية والأرياف 

كتب : عبدالرحمن هشام 

" لما كنا صغيرين كانوا أهالينا زمان بيحكولنا عن حاجة اسمها ( النداهة ) وكنا دايماً بنخاف وبنترعب لحظة بس سماع الإسم ده .. بس إيه السر ورا الإسم ده وليه اتسمى الكيان ده كده ؟ خلينا ناخدها واحدة واحدة ، نرجع لفترة الخمسينات والستينات في الريف . الفلاحين كانوا كلهم بيخلصوا شغلهم في الأرض و بيروحوا البيت قبل المغرب و محدش بيعدي من ناحية الترعة بعد المغرب علشان خايفين .. طب خايف من إيه يبوعمو ؟ يقولك : "خايف من النداهة " ، ركز كده في الجملة وأنت هتعرف اتسمت ليه كده دوناً عن كل الأسماء مثلاً ليه مش : ( البعبع ، المخوفاتية ،.... ) ، النداهة علشان لما تمشي بليل في الأراضي الزراعية لوحدك هتسمع اسمك بيتنده تلات مرات المفروض إنك متروحش ورا الصوت ده حسب المعتقدات القديمة لأهالي الريف علشان النداهة هتاخدك وتنهي حياتك البائسة عزيزي القارئ ، طب اشمعنى بتختار الريف ؟ هقولك : أولاً منطقة نائية تقدر تستدرج فيها فريستها ، ثانياً محدش هيسمعك مهما صرخت لأن صوتك مش هيوصل بسبب إن الناس في بيوتها ، ثالثاً وده الأهم الناس هناك كلها بتصدق في أسطورة النداهة ودي نقطة خطيرة جداً ، خلينا دلوقتي نعرف سوا أهم الأفلام اللي اتعملت و اتكلمت عن الكيان ده منهم فيلم ( النداهة ) للمبدعة ماجدة الصباحي و إيهاب نافع و شكري سرحان ، كمان مسلسل من أجمل المسلسلات المصرية من فئة الرعب وهو مسلسل (أبواب الخوف ) للفنان عمرو واكد .. فيه حلقة ظهرت خلالها النداهة و اللي كانت بتجسد دورها نسرين أمين ، اللي خلى ( النداهة ) حقيقة هي تصديق الناس لحكايتها ، طب الناس وصفت شكلها إزاي ؟ فيه اللي قال إنها طويلة و لابسة أسود و عندها مخالب ، فيه كمان اللي قال إنها بتتنكر في زي فلاحة و بتقعد على الترعة و تفضل تنده عليك لحد ما تستجيب و اللي شهد خلال الخمسينات حالات وفيات كتير عند الترعة و محدش كان عارف السبب ، فيه ناس وصفت شكل أرعب من كده و إنها ليها أنياب و حوافر و سرعتها كبيرة جداً و تقدر توصل ليك بسرعة ، خليني أقولك متصدقش أي حاجة بتسمعها عزيزي لكن ده ميمنعش الخوف " .