( المصارعة الحرة ) .. أساطير و لعبة مثيرة

كتب : عبدالرحمن هشام 

" النهاردة خلينا نتكلم عن مجال مختلف شوية و غريب بالنسبة لبعضكم و يمكن مش كله متابع و تلاقي كمان اللي بيقولك المصارعة كلها ضرب مش حقيقي و تمثيل أصلاً ، لكن خليك متابع للآخر و هتعرف إنها أكتر من مجرد لعبة ، دلوقتي خلينا نتكلم عن أساطير اللعبة شوية و هنا هنتكلم بإستفاضة عزيزي القارئ ، أغلبنا كان بيتابع قناة الحلبة و المذيع اللي كلنا كنا بنسمعه وهو بيعلق على ماتشات المصارعة ، طيب مين من أساطير اللعبة اللي عرفناهم في جيلنا ؟ عندك ( جون سينا ) واحد من أهم المصارعين اللي بدأ في سنة 2002  و اللي لسه مستمر لغاية دلوقتي ، الفينيش بتاعه( AA) و لعب ضد مصارعين كتير زي باتيستا ، راي ميستيريو ، كيرت أنجل و كمان حركة الإخضاع أو الإستسلام الخاصة بيه اسمها( STF ) بس قبل ما بيفنش كان بيجهز للفينيش بالحركة اللي كلنا عارفينها ألا وهي ( YOU CAN'T SEE ME ) كمان شخصية (جون سينا ) من البداية لحد النهاردة كانت شخصية فيس ( محبوبة ) وواخدة تفاعل خصوصاً مع الأطفال من بداية ظهورها و حالياً (جون سينا) بيصور أفلام في هوليود و كان ليه ظهور قريب في مهرجان ( سمر سلام ) ، دلوقتي هنتكلم عن أسطورة حية في المصارعة أول ما ظهر من سنة 1991 لحد اعتزاله سنة 2019 كان عامل كذا شخصية منهم ( وزير الظلام _ Minister of the dark ، الرجل الميت _ The deid man ) ، وهو فعلاً the g.o.a.t المصارعة وهو الأسطورة ( أندرتيكر ) اللي كان و مازال أشهر حد في المجال و اللي كلنا كنا فاكرين إنه وكين أخوات ، طبعاً ليه فينيشين : واحد مبدئي وهو ( shock slam ) وده أغلب الأوقات بيفلت منه المنافس علشان كده بيستعين بالفينيش التاني واللي مكتوب باسمه ( Tombstone beldriver ) وكمان (أندرتيكر ) ليه سلسلة انتصارات في مهرجان (راسلمينيا) واتكسرت السلسلة على إيد ( بروك ليسنر ) أولاً ثم ( رومان رينز ) ثانياً علشان يستكملوا البناء بتاعهم و ياخدوا هايب و تشجيع من الجمهور ودي كانت من ضمن الخطط للدفعة بتاعتهم ، بس طبعاً عمرنا ما هننسى العداوة بين ( أندرتيكر ) و ( تريبل إتش ) ، أندرتيكر كان طول مسيرته بيقدم ماتشات قوية و ليها طابع خاص و خصوصاً لحظة دخوله ليها هيبة عند المنافسين لما بيسمعوا الموسيقى بتاعته ، هنتكلم عن تالت أسطورة معانا و ليها تقلها برضه و أعتقد هتتفق معايا وهو ( Legend killer ) أيوه زي ما قريت كده دي كانت شخصية ( راندي أورتن ) سنة 2020 حرفياً كان بينهي مسيرة أي مصارع أسطوري زي ( ريك فلير ) كده بحركة ( band kick ) و اللي اتحاد WWE منعها علشان الأضرار اللي بتسببها ، لكن أنت لو رجعت 14 سنة لورا سنة 2009 هتلاقي ( راندي أورتن ) كان عامل حالة و الجمهور كان متفاعل مع الشخصية الهيل ( المكروهة) وكان معاه لقب الإتحاد و اللي محدش كان طايقه ساعتها و كانت دي أفضل فترة ليه من ساعة ما دخل الإتحاد و بدأ الديبيو بتاعه سنة 2002 ، الفينيش بتاعه اسمه ( RKO ) وده اختصار لإسمه ( Randle Keith Orton ) و من قبلها بيجهز للفينيش بحركة ( power slam ) و اتسمى بكذا اسم منهم (the viper _الأفعى ) بسبب إنه بيخطف الفوز بسرعة و قبل ما يضرب ضربته الأخيرة بيلف جسمه كأنه بيعصر خصمه ولكن للأسف ( راندي أورتن ) حالياً مصاب و بيحاول يرجع بس الأطباء حذروه بإنه هينهي مسيرته لو رجع و إنه لازم يعتزل ، طبعاً المصارعة مليانة بأساطير منهم ( ستيف أوستن ، ذا روك ، ذا ألتيميت واريور ،.....) مهما تتفرج على المصارعة وأنت مش فاهم المجال هتحس إن الناس دي بتعمل حاجة ملهاش لازمة ، بس لما تبقى فاهم كل تفصيلة خصوصاً العداوة بين المصارعين و الاستوري بتاعتهم هتستمتع و هتستنى كل أسبوع علشان تعرف الجديد دايماً ، في النهاية ربنا يرحم كابتن / ممدوح فرج لأنه السبب في إننا نتعرف على المصارعة الحرة و نحبها لغاية دلوقتي "