كوكب الشرق أم كلثوم

 طبعا كلنا عارفين صوت أم كلثوم اللي مش هتلاقي حد بيختلف عليه ، وأغاني أم كلثوم مع كوباية شاي بالنعناع فأنت كده فصلت عن الواقع تمامًا ، وعن أي زعل أو ضغط.

 يمكن واحنا صغيرين كنا بنقول أحنا مش فاهمين حاجه وايه الاغاني القديمه دي ! 

بس هتكتشف نفسك بعد كده انك لما  بتحب تكون كويس ، او تطلع من مود وحش هتلاقى نفسك بتشتغل أم كلثوم ، احنا مكناش عارفين نسمعها واحنا صغيرين عشان مركزناش صح مع كلامها ، وصوتها القوي اللي كافي بجد أنه يوصلك احساس الاغنيه بكل تفاصيلها .

بجد لما تسمع أم كلثوم هتحس انك بتسمع فن بجد ، و هتعرف وقتها ليه كل الناس دي كانت بتحضر حفلاتها ، ومش بتمل من الوقت،  و كانت قد ايه بتستني كل حفلة ليها بفارغ الصبر.

طب سمعتها في أغنية سيرة الحب وهى بتقول " وقابلتك انت لقيتك بتغير كل حياتي معرفش ازاي حبيتك معرفش ازاي يا حياتي " الأغنية دي واحده من اجمل اغاني كوكب الشرق ، بسبب نغمتها المميزة ، و ألحانها الهادية مع الصوت القوي لأم كلثوم فهي حقيقي بتخليك تدخل في احساس الأغنية .

 قدمت أم كلثوم أغنية "سيرة الحب" في ديسمبر 1964 الأغنية الجميلة دي من كلمات الشاعر العظيم  مرسي جميل عزيز ، وكان شرطه لأم كلثوم أنها متتدخلش في كلمات الأغنية ، وكمان عدم تدخل الملحن الجميل بليغ حمدى ، لأن من المعروف عن أم كلثوم تعديلها لبعض أغانيها أحيانًا ، و بالفعل الملحن بليغ حمدي متدخلش بأي تعديل في كلمات الأغنية ، وقال إن الشاعر مرسي جميل ابدع في انتقائه لكلمات الاغنية ، وأنها بالفعل مش محتاجه اي تعديل .

وبعد غناء أم كلثوم للأغنية في حفلها ، كان تعليق الشاعر الكبير صلاح جاهين عن الأغنية أنها الابنة المراهقة للأغنية انت عمري اللي كتب كلماتها أحمد شفيق كامل ، ولحنها محمد عبد الوهاب .

اغاني ام كلثوم فعلا مجموعة متكاملة من فن أصيل ، ومش بس سيرة الحب اللي اتكلمنا عنها دي أغانيها كلها حكايات ، و قصص عن فن جميل اغاني تجبرك تسمعها من جمالها ، وجمال كلماتها ، تخيل الصوت القوي الجميل اللي بتسمعه ده ، كان بيوصلك بمعدات ، و سماعات مش عالية الجودة ، أو متقدمة زي دلوقتي و لكن الصوت كان  كله وضوح ، وقوة وتناسق في طبقات الصوت ، والجودة ، ويمكن مش هبالغ ، لو وصفت أنها أكثر جودة من أي معدات حديثة ، أم كلثوم صوت ليس له مثيل ، فن من الزمن الجميل إللى ميتعوضش.