أشهر سينما في الإسكندرية

 تاريخ أشهر سينما في محطة الرمل 

كتب : عبدالرحمن هشام 

دايما لما بنتمشى في الشوارع بيلفت انتباهنا إعلانات أو يفط أو أيا كان اللي بيجذبنا لكن لما تمشي في محطة الرمل في إسكندرية هتحس إنك ماشي في شوارع لوس أنجلوس ، حرفيا كل اللي أنت عايزه هتلاقيه زي مثلا إنك لما يكون نفسك تشوف فيلم يا إما بتختار إنك تتفرج على منصات زي watch itأو مواقع زي إيجي بيست ومعاك مشروبك المفضل أو هتنزل السينما تتفرج مع الناس اللي أنت خارج معاهم ،خليني أقولك يا عزيزي إن شارع صفية زغلول مليان بسينمات كتير لعل أبرزهم سينما مترو السينما اللي مفيش اتنين يختلفوا عليها ولغاية دلوقتي قائمة وبتعرضلنا كل الجديد من الأفلام ، سيبني أقولك إن زمان السينما كانت بالنسبة للناس هي أكبر رفاهية ممكن تتحقق ليك وكانت حاجة عظيمة لما حد يقول إنه حجز تذكرتين في السينما للفيلم الفلاني ، يلا بينا نبدأ نعرف سينما مترو ابتدت إزاي ؟ 

أول حاجة خلينا عارفين إن سينما مترو كانت في الأول عبارة عن مدرسة تحت اسم ( سان لويس ) أو القديس لويس ، والشارع كان اسمه شارع المسلة لحد ما اتغير الإسم وبقى اسمه  ( شارع صفية زغلول )  ، سيبني أقولك إن أول بداية لسينما مترو في عرض الأفلام كانت سنة ١٩٥٠ وأول إنطلاقة للأفلام داخل جدران السينما، تعتبر من أوائل السينمات التي ظهرت في الإسكندرية وبدأت في عرض الكثير من الأفلام الكلاسيكية المصرية والعربية والأجنبية ، من المفارقات فيه بقى سينما بنفس الإسم في شارع طلعت حرب في القاهرة واللي ظهرت في منتصف القرن العشرين ولكن ليس لها علاقة بالسينما السكندرية،  سينما مترو قصادها فيه سينما اسمها ( ريالتو )

، شارع صفية زغلول ذات نفسه مليان بسينمات ومطاعم منهم مطعم ( سانتا لوتشيا ) ، كان زمان بعض الناس في الإسكندرية بتتفسح أو الخروجة الوحيدة ليهم هي السينما وكانت يوم الخميس خاصة إن الجمعة بيبقى إجازة وبعدين بيروحوا لمحل اسمه ( خروب آمال ) بيشربوا عصاير ومشروبات مختلفة منها الخروب اللي اتسمى المحل على اسمه ، محطة الرمل كمان كل شئ فيها مختلف عن التاني مفيش حاجة شبه بعضها ، وصلنا يا عزيزي لآخر المحطة وهنضطر ننزل في شارع النبي دانيال ده لو أنت غاوي القراءة ، طول ما أنت ماشي في إسكندرية أكيد هتندهش من جمال عروس المتوسط حتى لو كنت من أهلها .