اهو جه يولاد

   

كتب: حبيبة طلبة

سيبلي نفسك كدا وتخيل لو عادل إمام-الزعيم-بذات نفسه قال إنه جاي يزورك فبيتك...هتعمل ايه؟

 هتقوم تروق البيت وتنضف وتلبس احسن لبس وتعمل احلي الاكلات....صح؟

طب مابالك بقي إن في ضيف رباني جاي لغاية عندنا،ربنا باعتهولنا عشان يزور قلوبنا المهجورة ويسكنها بالرحمة والغفران،يبقي لازم تنضف قلبك من أي غل،حقد،ضغينة،وكل المشاعر السلبية دي قبل مضيفنا يجي ويهل،مينفعش تستتي لما يجي عشان تصلح غلطاتك في حق نفسك وغيرك....زوجتك...والدك ووالدتك....اخواتك واصحابك...حتي نفسك ليها عليك حق. 

رمضان دا نعمة مبعوتالك أنتِ وانتَ وانا،معقولة الفرصة جايالي أنا يارب،انا عبدك اللي مليان ذنوب وتقصير؟!

ايوا الفرصة دي لينا وعشان ربنا لطيف بيلطف بعباده.

سيدنا "سلمان الفارسي"بيروي حديث للنبي عليه الصلاة وأتم التسليم بيقول(إذا جاء رمضان فُتِحَت أبواب الجنة وغُلِقت ابواب النار وصُفِدَت الشياطين)صحيح البخاري

كمل تخيل معايا....احنا مش علي الارض...احنا دلوقتي ضيوف فوق فالسما عند ربنا وشايف كل حاجة بتحصل اول ما رمضان يهل،ابواب الجنة الثمانية بتتفتح والأبواب ضخمة،والملايكة بكل قوتهم بتفتحها،الشجر والنبات كله حواليك اللون الأخضر طاغي،شامم ريحة الجنة؟

جنة فيها ما لا عين رأت ولا أذن سمعت ولا خطر علي بال بشر!

30 يوم تحدي لنفسك!

النبي عليه افضل الصلاة والسلام قالنا ايه(من صان نفسه في رمضان...جعل الله له مع نهاية الشهر قصر من ذهب وفضة وياقوت لو أن الدنيا جُمِعَت فدخلت في القصر لا تساوي الا مربط ماعز)صحيح مسلم.

دا غير إنه فرصة كويسة تقرب بينكوا كعائلة،كل مرة انت بتيجي متأخر وبتاكل لوحدك وهما يكونوا سبقوك لانك اتأخرت،عندك شغل أو مشوار أو قاعد مع صحابك عالقهوة،رمضان بيغنيك عن كل دا وهتكونوا كلكوا سوا علي سفرة واحدة بتجمعكوا بحب بمودة،وبعد الفطار بنحضر نفسنا لصلاة التراويح،الصحاب تعدي علي بعض ويروحوا المسجد ويصلوا ويدعوا فخشوع وذل لله عز وجل،دا كمان ربنا قاله في القرآن(وفي ذلك فاليتنافس المتنافسون) كلنا بنسابق بعض عشان نوصل لربنا ونقربله بأعمال ترضيه،في اللي بيختم القرآن مرة واتنين وأكتر.

مستني ايه قوم حضر للضيف دا جاي عشانك مخصوص💚